الزلابيه مشهورة جدا فى مصر وليها شعبية كبيرة جدا خصوصا فى شهر رمضان من السهل جدا انك تلاقيها بتتباع فى اكشاك صغيرة فى الشارع بسعر متواضع جدا.

على كل حال من الصعب جدا اننا نلاقي وصفة للزلابيه تطلعها مظبوطه زي اللى بنشتريها ، ياما بتطلع صلبة جدا او طرية جدا او حتي مطاطية جدا !

لكن لحسن الحظ لقيت وصفة جميلة جدا بتطلع زلابيه مقرمشة جدا وزي اللى بنشتريها من برا والوصفة دي قدرت اوصلها عن طريق قناة هبة ابو الخير على اليوتيوب. هبة متميزة جدا فى الطبخ وعندها وصفات اكل كتير مميزة.

الزلابيه او لقمة القاضي او العوامة تعتبر واحده من الحلويات المحبوبة جدا وفي الطريقة دي هتعمليها زي مابتشتريها من برا ومش هتحسي بفرق لكن قبل ما نبداء في شوية نصايح مهم جدا تعرفيهم وتحطيهم فى الاعتبار اثناء تحضير الزلابيه.

نصائح مهمة قبل عمل الزلابيه

مهم جدا ان يكون الحلة مفيهاش اي عجين وانتي بتضيفي كتل الزلابيه والا هتعمل خيوط واشكال غريبة.

من المهم جدا اننا نضيف كوباية الماية على عجينة الزلابيه بالتدريج عشان نقدر نتحكم فى قوام العجينة.

العجينة المظبوطة لو شكلتيها باى طريقة هتطلع معاكي مظبوطة ان شاء الله لان السر فى العجينة مش فى طريقة تشكيلها ، التشكيل بالتدريج هيظبط معاكي وممكن تجربي 2 الاول وتشوفي هيظبطوا معاكي ازاي.

طريقه عمل شربات الزلابيه

فى حلة على النار هتضيفي السكر والماية واما تسيبي الخليط ده بدون تقليب وتسخنيه على النار او تقلبيه كويس من منتصف الحلة وتدوبي السكر كويس قبل تسخينه.

بمجرد ما تولعي النار علي الحله من المهم انك توقفي تقليب تماما ، واول ما الشربات يبداء يغلي تضيفي ملعقة كبيرة من عصير الليمون وهدي النار وسبيه يغلي لمدة 15 دقيقة.

بعدها صبي الشربات فى وعاء يكون جاف وسيبيه يبرد لمدة 3 ساعات ، قوام الشربات بعد مايبرد المفروض يكون تقيل واقرب لقوام العسل ، شربات الزلابيه بنستخدمه لما بيكون تقيل بارد.

طريقه عمل عجينة الزلابيه

  • فى العجينة دى هنستخدم كوباية ونص من الماية لكن هتاخدي نص كوباية ماية وهتدوبي فيهم الخميرة والسكر وغطيهم وسيبيهم علي جنب لحد ما الخميرة تكون طبقة كده على الوش.
  • فى طبق عميق هتضيفي الدقيق ، وتضيفي عليه النشا والكاسترد والحليب البودرة والبيكينج بودر والفانيليا والملح وقلبيهم كويس. يعنى هتخلطي الدقيق مع كل المواد الجافة.
  • نضيف علي الخليط خليط الماية والخميرة والسكر وبعدها تضيفي اللبن الرائب ويكون فى درجة حرارة الغرفة او يكون دافئ وبعدين تضيفي الزيت وتقلبي كويس.
  • ضيفي كوباية ماية بالتدريج علي الخليط واعجني واياكي تضيفي الكوب كامل مرة واحده وطبعا ممكن تستخدمي العجان او المضرب هيسهل عليكي كتير.
  • قوام العجينة المفروض يكون اتقل بحاجه بسيطة من قوام الكيك ، بعدها نجيب المضرب اليدوي واضربي كويس وتقريبا هتحتاج معاكي 5 دقائق عجن وكل ما تعجنيها اكتر كل ماتطلع مظبوطة معاكي اكتر.
  • غطيها وسيبيها فى مكان دافئ مظلم لمدة من ساعة ل 3 ساعات ، وكل ما تاخد وقت اكبر فى التخمير كل ما تطلع مظبوطه اكتر بكتير.
  • بعد ما اتخمرت كويس لميها ورجعيها لقوامها قبل التخمير بدون عجن او تقليب كتير يعنى لميها بكل بساطه بالملعقة.
  • فى اكتر من طريقة للتشكيل منها انك تستخدمي كيس حلواني وتقفليه كويس وتقصي بالمقص فى الزيت او تشيلي بايديكي وتحطي فى الزيت او تعملي بطريقة اسهل وهى انكي تقلمي العجين باستخدام ملعقة معيارية 5 جرام او الملعقة اللى بيتم عمل بها كور الايس كريم بس اهم حاجه ان يتم نقع الملعقة فى الزيت قبل استخدامها فى العجين عشان العجينة متلزقش فيها.
  • هتاخدي العجينة فى ايديك وتخرجي جزء صغير مابين الابهام والسبابة وتاخديه بالملعقة وتحطيه فى الزيت ، الزيت المفروض يكون غزير ودرجة حرارته تكون متوسطة والافضل نستخدم حلة فى القلي.
  • بلاش تحطي كمية كبيرة اوي من كور الزلابيه فى الحلة عشان متلزقش فى بعضها ومتقلبيش علي طول استني كده شوية تمسك نفسها الاول فى الزيت لحد ما تطمني انها مبقتش عجينة وبعد كده قلبي فيها باستمرار واول ماتاخد لون دهبي خفيف كده خرجيها.
  • في الطريقة دي هنقليها على مرتين هتصفيها فى مصفة لمدة دقيقة وبعد كده هتنقليها لصينية واسعة عشان متبقاش فوق بعضها تبقى جنب بعضها وتسيبها تبرد من نص ساعه لساعتين وكمان سيبي الزيت يبرد شوية.
  • بعد كده حطيها وهي باردة فى الزيت البارد واقليها للمرة التانيه وده السر اللي يخليها تفضل وقت كبير محافظة على قرمشتها.
  • اضغطي عليها بالملعقة كده اللى بتقلبي بيها وهتلاحظي انها بتنتفخ اكتر وقوامها هيقرمش جدا والتقليب المتواصل هيخليها تاخد لون حلو من كل الجهات وبعد كده شيلها من الزيت على مصفى هتستني دقيقتين تصفي الزيت منها وبعد كده نزليها فى الشربات.
  • قلبيها فى الشربات وسبيها دقيقة او اكتر كل ما تسبيها اكتر كل ما هتحلو اكتر وبعدين صفيها فى مصفى تانيه من الشربات وبالهنا والشفا.

مقادير الزلابيه

شربات الزلابيه

3 كوب سكر

2 كوب ماء

ملعقة كبيرة عصير ليمون

عجينة الزلابيه

3 كوب دقيق متعدد الاستخدام ( 375 جرام )

3 ملاعق كبيرة نشا (60 جرام)

1 ونصف ملعقة كبيرة كاسترد ( 15 جرام ) اذا غير متوفر يستبدل ب نشا

ملعقة كبيرة خميرة ( 10 جرام )

3 ملاعق كبيرة زيت ( 35 جرام )

ملعقة صغيرة فانيليا ( 5 جرام )

2 ملعقة كبيرة حليب بودرة ( 40 جرام )

ملعقة كبيرة سكر ( 20 جرام )

نصف ملعقة صغيرة ملح ( 3 جرام )

ملعقة صغيرة بيكنج بودر ( 5 جرام )

1 ونصف كوب ماء دافئ (307 جرام)

3 ارباع كوب لبن رايب بحرارة الغرفه ( 160 جرام )

التعليقات (0)